అక్కడకి పోవడానికి మగ వారు క్యూ కడుతుంటే వారి భార్యలు భయపడుతున్నారు

ఇటలీ ఉత్తర భాగంలో ఉన్న బగ్నోలో మెల్లా అనే చిన్న నగరంలో ఎనిమిదేళ్ళుగా నడుస్తూ ఉన్న లా కఫే అనే కాఫీ, బీర్ బార్ ముందు ఉన్నట్టుండి మగ వాళ్ళు క్యూలు కడుతూ ఉంటే వారి భార్యలు మాత్రం తమ భర్తల్ని అటు వేపు వెళ్ళకుండా ఉంచాలని నానా తంటాలు పడుతున్నారు. ఈ భార్యల లిస్టులో ఆ నగర మేయర్ క్రిస్టినా అల్మీచీ కూడా ఉంది. ఆ బార్‌కి వెళ్ళకూడదు అని ఆమె తన భర్తకి ఒక షరతు కూడా విధించారట.
 
మగ వాళ్ళు ఆ బార్ వైపు క్యూలు కట్టడానికి, వాళ్ళని చూసి వారి భార్యలు భయ పడడానికి కారణం ఆ బార్ ఓనర్ లారా మాజి కొత్త వేషం. ఎనిమిదేళ్ళుగా బొటాబొటీగా నడుస్తున్న తన కఫేని పాపులర్ చేయడానికి ఆమె తన దుస్తుల్ని మార్చి వేసింది. ఇంకా ఖచ్చితంగా చెప్పాలంటే తీసి పారేసింది. పొడవాటి స్కర్టులూ, గౌనులూ తీసేసి పొట్టి డ్రస్సులు వేసుకొని శరీరం కొంచెం దాచి ఎక్కువ భాగం చూపిస్తూ ఉన్న ఆమె వేషధారణే ఈ గొడవకి మూల కారణం.
       
ఆమె కఫే ఉండే వీధిలో ట్రాఫిక్ ఎక్కువై పోయి రెండు వీధులు పార్క్ చేసిన కార్లతో నిండి పోతున్నాయి. కొంత మంది అయితే 70 కిలోమీటర్లు ప్రయాణం చేసి ఆ కఫేకి వస్తున్నారు. ఫేస్ బుక్‌లో ఆ కఫే పేరిట ఉన్న పేజీకి 7888 మంది అభిమానులు ఉన్నారు. ఇటాలియన్ టీవీలొ ఆమెతో ఒక లైవ్ షో కూడా పెట్టారు. ఈ షోలో బగ్నోలో చుట్టు పక్కల నుంచి చాలా మంది ఆడవారు ఫోన్ చేసి తమ బాధలు చెప్పుకున్నారు. ఆమె నిండుగా గుడ్డలు వేసుకోవాలి లేదంటే ఆ కఫే ఎత్తి వేయాలి అనేది వాళ్ళందరి అభిప్రాయం.

"ఇందులో నా తప్పు ఏముందో అర్ధం కావడం లేదు. నేను ఎలాంటి బట్తలు వేసుకోవాలి అన్నది నా ఇష్టం. నా కఫేకి ఎక్కువ మంది మగ వాళ్లు వస్తుంటే నా తప్పు ఏం ఉంది. అందుకు నేనేం చేయ గలను" అని చెప్పి తప్పుకుంది లారా మాజి.

ఆరోగ్య శ్రీలో ఎడపెడా వెన్నుపోట్లు

ఆ మధ్య మీడియాలో ఆరోగ్యశ్రీతో కడుపు కోత అన్న కథనాలు వచ్చాయి. నిండా పాతికేళ్ళు లేని అమ్మాయిలకి కూడా ఆరోగ్యశ్రీ పథకం కింద గర్భ సంచి తొలగించే ఆపరేషన్లు కుప్పలు తెప్పలుగా జరిగిపోవడం గురించిన స్టోరీ అది. ఆ తరువాత ఆ ప్యాకేజీకి ఇచ్చే డబ్బు తగ్గించి కొంచెం టైట్ చేశాక ఆ ఆపరేషన్లు కొంచెం తగ్గాయి. అయితే ఆరోగ్యశ్రీ కింద జరిగిపోతున్న మరొక అన్యాయం వెన్నుపూస ఆపరేషన్లు. వయసుతో నిమిత్తం లేకుండా, లక్షణాలతో సంబంధం లేకుండా, ఆపరేషన్ అవసరమా లేదా అన్న మీమాంస లేకుండా ఆరోగ్యశ్రీ కార్డు చేతబట్టుకొని నడుము నొప్పి అని హాస్పిటల్‌కి వెళితే వెన్నుపూసకి ఆపరేషన్ చేసిపారేస్తున్నారు.
  

వీటిలో రెండు ప్యాకేజీలున్నాయి ఆరోగ్యశ్రీలో. ఒకటి Discectomy. వెన్నుపూసల మధ్య ఉన్న inter vertebral disc అన్న భాగం వెనక్కి జారి నడుము నొప్పి, కాలు నొప్పి, తిమ్మిరి లాంటి లక్షణాలు వచ్చి MRI scan లో ఆ disc prolapse కనిపిస్తే ఆపరేషన్‌కి అప్రూవల్ వస్తుంది. ఈ ప్యాకేజీ 35,000 రూపాయలు ఉంటుంది. ఇందులో హాస్పిటల్‌కి పెద్దగా ఖర్చయ్యేది ఉండదు. కాబట్టి హాస్పిటల్స్‌కి ఈ ఆపరేషన్ వరప్రసాదినిలా కనిపిస్తుంది. అయితే నిపుణులు, పుస్తకాలు చెప్పేదాని బట్టి 90-95 శాతం పేషంట్లలో ఈ లక్షణాలు వాటికవే తగ్గుతాయి. డాక్టర్లు తేలికపాటి నడుముకి సంబంధించిన వ్యాయామం, కొన్ని జాగ్రత్తలు చెప్పి పంపితే చాలు. American spine surgeons assocoation కూడా ఈ జబ్బుకి యోగా దివ్యంగా పని చేస్తుందని చాలా పరిశోధనల తరువాత అంగీకరించారు. భుజంగాసనం, శలభాసనం, నావాసనం ఈ నొప్పిని తగ్గించడమేకాక నివారిస్తాయి అని నిపుణుల ఉవాచ.


 

 

అయితే ఇలా ఆపరేషన్ లేకుండా చేసే వైద్యం అంత ఆకర్షణీయంగా ఉండదు. ఆరోగ్యశ్రీ లేని రోజుల్లో ఖర్చుకి జడిసి చాలా మంది ఆపరేషన్ అంటే వెనుకడుగు వేయడమో, ఒక డాక్టరు నుంచి మరొక డాక్టరు దగ్గరకి వెళ్ళడమో, ఆపరేషన్‌కి సిద్ధపడి డబ్బు సమకూర్చుకోవడానికి సమయం తీసుకోవడమో చేసినప్పుడు ఈ జబ్బు తానంతట అదే తగ్గిపోయి ఆపరేషన్‌తో పని లేకుండా పోయేది. ఇప్పుడు ఆరోగ్యశ్రీ వల్ల డబ్బు అనేదానితో పని లేదు కాబట్టి ఆపరేషన్ వాయిదా వేయడానికి డాక్టరు, పేషంటు ఇద్దరూ సిద్ధంగా లేరు. చక చకా ఆపరేషన్లు జరిగి పోతున్నాయి.
 

 

 

ఈ ఆపరేషన్‌లో వెన్నుపూసని వెనక నుండి ఓఫెన్ చేసి, కొంత భాగం ఎముకని తొలగించి, అందులోంచి డిస్క్ తొలగిస్తారు. అయితే ఆపరేషన్‌లో వెన్నుపూసలోని ఒక భాగాన్ని శాశ్వతంగా తొలగించి చేసే ఈ ఆపరేషన్‌తో భవిష్యత్తులో నడుము నొప్పి తిరిగి రావడమే కాక అలా వచ్చినప్పుడు మరింత క్లిష్ట మైన మరొక ఆపరేషన్ అవసరం అవుతుంది. ఇది ఆపరేషన్ వల్ల ఎలాంటి కాంప్లికేషన్ లేకుండా జరిగిపోయినప్పటి సంగతి. కాళ్ళకి పోయే నరాలు, మల మూత్ర విసర్జనని అదుపు చేసే నరాలు, అంగ స్తంభన కలించే నరాలు ఆపరేషన్ జరిగే ప్రాంతంలోనే ఉండడం వల్ల కొన్ని సార్లు అవి గాయపడి వాటికి సంబంధించిన సమస్యలు అంటే కాళ్ళు చచ్చు పడడం మల, మూత్ర విసర్జన మీద అదుపు లేకపోవడం, నపుంసకత్వం రావడం లాంటివి జరగొచ్చు.

ఇక రెండవ ప్యాకేజి Discectomy with fixation. దీనిలో 65,000 రూపాయలు ఉంటుంది. ఇది వెన్ను పూసలు జారడం, spondylolisthesis 

అనే జబ్బుకి, ప్రమాదంలో వెన్ను పూసలు దెబ్బతిన్నప్పుడు ఇస్తారు. మొదటి దానిలో నాలుగు స్టేజీలుంటాయి. ఇందులో నాలుగో దశలోకానీ ఆపరేషన్ అవసరముండదు. ఆరోగ్యశ్రీ కింద ఏ దశలో ఉంది అన్న దానితో పని లేకుండా స్కాన్‌లో వెన్ను పూస జారినట్లు కనిపిస్తే చాలు పేషంటుకి ఆరోగ్యశ్రీ కార్డు ఉండి ఆపరేషన్ చేయించుకుంటే మంచిది అని పేషంటుని కన్విన్స్ చేయగల టాలెంటు డాక్టరుకి ఉంటే ఆపరేషన్ జరిగిపోతుంది.

 

 

 

ఈ ఆపరేషన్లో వెన్నుపూసల్లో స్క్రూలు అమర్చి వాటికి రాడ్లు బిగిస్తారు. ఎముకలో స్క్రూ వేయడం అనేది మిగిలిన చోట్ల పెద్ద పని కాదు. ఓ అర ఇంచీ అటూ ఇటూ అయినా వచ్చే ప్రమాదమేమీ లేదు. కానీ వెన్నుపూసల మధ్య వెన్ను పాము, అందులోంచి వచ్చే నరాలు ఉంటాయి. ఏమాత్రం అటూ ఇటూ అయినా కాళ్ళు పడి పోవడం, మూత్ర మల విసర్జనల మీద అదుపు లేక పోవడం, అంగం స్థంభించక పోవడం లాంటివి జరగొచ్చు. 
 
ఇందులో మరొక ఆందోళన కలిగించే విషయమేమిటంటే చాలా మంది డాక్టర్లకి ఇలాంటి క్లిష్టతరమైన ఆపరేషన్లు నేర్పించే గినియా పందుల్లాగా ఆరోగ్యశ్రీ పేషంట్లు ఉపయోగపడుతున్నారు. ఇలా ఎడాపెడా వెన్నుపూసల మీద జరిగిపోతున్న ఆపరేషన్ల తాలూకూ దుష్పరిణామాలు మరొక పది పదిహేను సంవత్సరాలలో క్రమేపీ బయట పడుతాయి. అయితే అప్పుడు వాటికి వైద్యం చేయించుకోవడానికి ఆరోగ్యశ్రీలో వెసులుబాటు లేదు. 

ప్రమాదంలో వెన్నుపూస దెబ్బతిన్నప్పుడు కూడా చాలా సార్లు చిన్న చిన్న ఫ్రాక్చర్లకి ఆపరేషన్‌తో పని లేకుండా రెండు మూడు నెలలు బెడ్ రెస్ట్ ద్వారా నయం చేయవచ్చు. అయితే ఇలా ఆపరేషన్ చేయకుండా వైద్యం చేయడం చేతకాని తనంగా డాక్టర్లు భావించే రోజులివి. ఆరోగ్యశ్రీ పుణ్యమా అని పేషంటు కూడా అదే భావిస్తున్నాడు ఇప్పుడు. 

రవికలు విప్పి రొమ్ములు చూపడం వాళ్ళు నిరసన వ్యక్తం చేసే పద్ధతి

ఏదైనా అంశమ్మీద నిరసన తెలియజేయాలనుకుంటే ఒక చోట కూర్చుని నినాదాలు చేయడం అనేది సాధారణంగా చేసే ప్రక్రియ. కొన్ని సార్లు నోళ్ళకి నల్ల రిబ్బన్లు కట్టుకుంటారు. ఇంకొంచెం క్రియేటివ్‌గా కొన్ని సార్లు బూట్ పాలిష్ చేయడం లాంటివి కూడా చేస్తారు. మొన్న ప్రత్యేక తెలంగాణా కోసం రోడ్ల మీద వంటా వార్పు కూడా చేశారు. అర్ధ నగ్న ప్రదర్శన అనేది మరొక ఐటమ్. ఇది కేవలం మగ వాళ్ళే చేస్తారు.


అయితే ఉక్రెయిన్‌లో ఫెమెన్(FEMEN) అని ఒక సంస్థ ఉంది. వీళ్ళు ఏదైనా అంశమ్మీద నిరసన తెలియజేయాలని అనుకుంటే ఆచరించే విధానం అర్ధ నగ్న ప్రదర్శన. అందరూ ఆడవాళ్ళే దీనికి పూనుకుంటారు. వీరి సభ్యులు ఒక చోట చేరి జాకెట్లు, చొక్కాలు విప్పి పారేసి రొమ్ములు చూపించి నినాదాలు చేస్తూ తమ నిరసన వ్యక్తం చేస్తారు. 
    
పోయిన వారం ఉక్రెయిన్ రాజాధాని కీవ్‌లో భారత రాయబార కార్యాలయం ముందు ఈ సంస్థ కి చెందిన కొందరు అమ్మాయిలు ఇలా అర్ధ నగ్న ప్రదర్శన చేసి భారత జెండాని కాళ్ళతో తొక్కి కాల్చి వేశారు. భారత దేశానికి వచ్చిన ఉక్రెయిన్ అమ్మాయిలు చాలా మంది వ్యభిచారంలోకి దిగుతున్నారని, అంచేత ఉక్రెయిన్ యువతులకి వీసా మంజూరు చేసేటప్పుడు కొంచెం జాగ్రత్తగా ఉండాలని భారత రాయబార కార్యాలయం తన అధికారులకి సూచనలివ్వడం వీరికి కోపం తెప్పించింది. ఉక్రెయిన్ వ్యభిచారుల కొంప కాదు, మేము వ్యభిచారులం కాదు అని అర్ధ నగ్నంగా నినాదాలు చేశారు ఈ సంస్థ సభ్యులు. 
 
18 నుండి 20 యేళ్ళలోపు వయసున్న యూనివర్సిటీ విద్యార్ధినులు ఈ సంస్థ సభ్యులుగా ఉంటారు. ఇందులో ఇరవై మంది యాక్టివ్ సభ్యులు ఉన్నారు. నిరసన ప్రదర్శనలో రవికలిప్పి చూపడం వీరు చేస్తారు. వీరికి అండగా మరొక మూడు వందల మంది సభ్యులు ఉన్నారు. 2008 లో హన్నా హుట్సోల్ అనే ఆమె ఈ సంస్థని స్థాపించారు. మన పాత బస్తీ అమ్మాయిల్లాగా పెళ్ళిళ్ళ పేరిట విదేశీయుల చేతిలో ఉక్రెయిన్ ఆడ పిల్లలు మోస పోవడం చూసి అందుకు నిరసన తెలియ జేయడానికి ఈ సంస్థ పుట్టింది. 
 
HANNA HUTSOL

 
      AT DAVOS

సెక్స్ టూరిజానికి, ఉక్రెయిన్‌లో పెరిగి పోతున్న వ్యభిచారానికి, ఇంకా అనేక అంతర్జాతీయ అంశాలమీద వీరు తమదయిన పద్ధతిలో నిరసన తెలియజేస్తారు. ఆ మధ్య వ్యభిచార నేరం అరోపించబడి రాళ్లతో కొట్టి చంపే శిక్షకి గురయిన ఇరాన్ యువతి మహ్మది సకినేకి మద్ధతుగా కూడా వీళ్ళు టాప్‌లెస్ ప్రదర్శన చేశారు. ఉక్రెయిన్‌లో ఆడవారికి పబ్లిక్ టాయిలెట్‌లు కావాలని కొందరు సభ్యులు పిరుదులు చూపించి ప్రదర్శన చేశారు. ఇది తప్పితే మిగతా అన్ని ప్రదర్శనల్లో వీళ్ళు కేవలం రొమ్ములు మాత్రమే చూపించి నిరసన వ్యక్తం చేస్తారు.
 
నిరసన తెలియజేయాలంటే రొమ్ములు చూపడం ఎందుకు అని ఎవరయినా అడిగితే "ఈ దేశంలో మా ఆవేదన అందరికీ తెలియాలంటే ఇదొక్కటే మార్గం. ఏదో బ్యానర్లు పట్టుకొని నినాదాలు చేస్తే ఎవరూ పట్టించుకోరు" అన్న సమాధానం వస్తుంది. రాబోయే పార్లమెంటు ఎన్నికల్లో పోటీ చేయాలని కూడా ఈ సంస్థ భావిస్తోంది. 

టాయిలెట్‌లో కూడా ప్రయాణీకులని ఎక్కిస్తున్న పాక్ విమానాలు

సాధారణంగా పల్లెలకి వెళ్ళే ఎర్ర బస్సుల్లోనూ, పండగలూ పబ్బాలూ ఉన్నప్పుడు ఎక్కడైనా సరే బస్సుల్లో సీటింగ్ కెపాసిటీ గురించి పట్టించుకోరు. వచ్చిన ప్రతివాడిని బస్సెక్కించి ఎక్కడో చోట సర్దేస్తారు. అయితే విమానంలో కూడా ఇలా జరుగుతుందని ఎవరూ ఊహించరు. మొన్న గురువారం(ఫిబ్రవరి 16)న పాకిస్తాన్ ఎయిర్ లైన్స్ విమానంలో ఇలాంటి వింత జరిగింది. PIA(pakistan international airlins) కి చెందిన PK303 విమానాన్ని నడిపే కెప్టెన్‌కి గతంలో ఇలా బస్సులని నడిపిన నుభవం ఉందేమో తెలియదు గానీ, విమానంలో సీట్లన్నీ నిండాక ఇద్దరు ప్రయాణీకులు వస్తే వారిని తిప్పి పంపలేదు. టాయిలెట్ ఖాళీగా ఉంది కదా దాన్ని వృధా చేయడం ఎందుకని అనుకున్నాడో ఏమో ఆ ఇద్దర్నీ అందులో కూర్చోబెట్టి లాహోర్ నుండి కరాచీకి విమానాన్ని నడిపేశాడు. 
  
 


ఈ విషయం తెలిశాక, సదరు కెప్టెన్ ’పెట్టె బయటి ఆలోచనా విధానాన్ని(out of the box thinking” మెచ్చుకోవలసింది పోయి బధ్రతా అధికారులు అతని మీద విచారణకి అదేశించారు.